کولمبو:: وزیر خارجہ مخدوم شاہ محمود قریشی کی سری لنکا کے وزیراعظم سے ملاقات ہوئی جس میں دوطرفہ تعلقات میں فروغ اور باہمی دلچسپی کے موضوعات سمیت اہم معاملات پر گفتگو کی گئی۔
پاکستانی وفد میں ڈی جی جنوبی ایشیا اور وزارت خارجہ کے ترجمان ڈاکٹر فیصل، سری لنکا میں تعینات قائم مقام پاکستانی ہائی کمشنر سمیت پاکستانی سفارتخانے کے اعلیٰ حکام شریک تھے۔
وزیر خارجہ نے وزیراعظم مہیندا راجا پاکسا کو ان کے بطور وزیراعظم تقرری پر پاکستانی وزیراعظم عمران خان اور عوام کی طرف سے دلی مبارکباد دی۔
وزیر خارجہ نے سری لنکن وزیراعظم مہیندا راجا پاکسا کی خدمت میں وزیراعظم عمران خان کا خصوصی خط پیش کیا۔ اس خصوصی خط میں وزیراعظم عمران خان نے اپنے سری لنکن ہم منصب کو دورہ پاکستان کی دعوت دی ہے۔
مخدوم شاہ محمود قریشی کا اس موقع پر کہنا تھا کہ پاکستان کی سیاسی قیادت وزیر عظم عمران خان کے وژن کے مطابق دوطرفہ تعلقات کو مزید فروغ دینے کے لئے پرعزم ہے۔ ستمبر 2019ء میں سری لنکن کرکٹ ٹیم کی پاکستان آمد سے، پاکستان میں بین الاقوامی کرکٹ دوبارہ بحال ہوئی۔ ہم آئندہ ٹیسٹ سیریز میں شرکت کیلئے سری لنکن کرکٹ ٹیم کی پاکستان آمد کے منتظر ہیں۔
وزیر خارجہ مخدوم شاہ محمود قریشی نے سری لنکن وزیراعظم کو پاکستان کی طرف سے شروع کی گئی معاشی سفارتکاری کے خدوخال سے آگاہ کیا۔ اور کہا کہ پاکستان اور سری لنکا کے مابین کثیرالجہتی شعبہ جات میں دو طرفہ تجارت اور سرمایہ کاری بڑھانے کے متعدد مواقع موجود ہیں جن سے دونوں ممالک بھرپور استفادہ کر سکتے ہیں۔
