لاہور:: آسٹریلیا کے خلاف دوسرے ٹیسٹ میچ کے دوران پاکستان کی ناقص بیٹنگ کا سلسلہ جاری ہے، قومی ٹیم پر فالو آن کا خطرہ سر منڈلانے لگا ہے۔
تفصیلات کے مطابق آسٹریلیا نے اپنی پہلی اننگز 589 رنز تین کھلاڑی آؤٹ پر ڈکلیئر کر دی تھی جس کے جواب میں پاکستان نے دوسرے روز کا کھیل ختم ہونے تک 6 وکٹوں کے نقصان پر 96 رنز بنا لیے ہیں۔
پاکستان کی جانب سے اننگز کا آغاز شان مسعود اور امام الحق نے کیا لیکن 3 کے مجموعے پر امام الحق 2 رنز بنا کر سلپ میں کیچ آؤٹ ہو گئے، کپتان اظہر علی بھی صرف 9 رنز کے مہمان ثابت ہوئے۔
شان مسعود 19 رنز بنا کر آؤٹ ہوئے جبکہ اسد شفیق 9 رنز بنا کر مچل سٹارک کا شکار بنے۔ افتخار احمد بھی صرف 10 رنز بنا کر آؤٹ مچل سٹارک کو وکٹ دے بیٹھے جبکہ محمد رضوان اپنا کھاتا بھی نہ کھول سکے۔
دوسرے روز کا کھیل ختم ہوا تو بابراعظم 43 اور یاسر شاہ 4 رنز کے ساتھ وکٹ پر موجود تھے اور پاکستان کو آسٹریلیا کی پہلی اننگز کی سبقت ختم کرنے کے لیے 493 رنز درکار ہیں۔
اس سے قبل آسٹریلیا نے 302 رنز سے اپنی نامکمل اننگز کا آغاز کیا تو مارنس لبوشین انفرادی سکور میں صرف دو رنز کے اضافے کے بعد شاہین شاہ آفریدی کی گیند پر بولڈ ہو گئے۔ اسٹیون اسمتھ بھی 36 رنز بنا کر شاہین آفریدی کا شکار بن گئے۔ ڈیوڈ وارنر نے شاندار بلے بازی کا سلسلہ جاری رکھا اور اپنی ٹرپل سنچری مکمل کی، وہ 335 رنز بنا کر ناٹ آؤٹ رہے،
یاد رہے کہ یہ دوسرا موقع ہے کہ کسی آسٹریلین کرکٹر نے پاکستان کے خلاف ٹرپل سنچری سکور کی جہاں 1998 میں مارک ٹیلر نے ٹرپل سنچری سکور کی تھی اور 21سال قبل پشاور میں آسٹریلیا کے خلاف ٹیسٹ میچ کی پہلی اننگز ہر لحاظ سے ایڈیلیڈ ٹیسٹ کی پہلی اننگز سے مماثلت رکھتی ہے۔
پاکستان اور آسٹریلیا کے درمیان اکتوبر 1998 میں پشاور میں سیریز کا دوسرا ٹیسٹ میچ کھیلا گیا تھا اور ایڈیلیڈ کی طرح انہوں نے پشاور میں بھی ٹاس جیت کر پہلے بیٹنگ کا فیصلہ کیا تھا۔
مذکورہ میچ اس وقت کے آسٹریلین کپتان مارک ٹیلر نے ناقابل شکست ٹرل سنچری سکور کی تھی اور جب ان کا اسکور 334 رنز تھا تو انہوں نے آسٹریلیا کی اننگز ڈکلیئر کرنے کا اعلان کردیا تھا۔
یہ دراصل مارک ٹیلر کا سابق عظیم آسٹریلین بلے باز ڈان بریڈ مین کو خراج تحسین تھا کیونکہ ان کا بھی ٹیسٹ کرکٹ میں سب سے بڑا اسکور 334رنز تھا اور اسی وجہ سے انہوں نے سابق کرکٹر کا ریکارڈ توڑنے کی کوشش نہیں کی تھی۔
آج ٹیسٹ میچ کے دوران کینگروز پلیئرز میتھیو ویڈ نے 38 رنز سکور کیے، وارنر اور ویڈ کے درمیان 99 رنز کی شراکت ہوئی۔ آسٹریلیا کا سکور 589 رنز پر پہنچا تو کینگروز قائد نے اننگز ڈکلیئر کرنے کا اعلان کر دیا۔
یاد رہے کہ برسبین میں کھیلے گئے پہلے ٹیسٹ میں آسٹریلیا نے پاکستان کو ایک اننگز اور 5 رنز سے شکست دی تھی۔
