کورونا، تجدیدِ انسان :: تحریر: عثمان یٰسین

آج پوری دنیا خدا کے بھیجے ہوئے عذاب یا آزمائش سے دوچار ہے۔ ہم اسے آزمائش گردان کرچلتے ہیں۔ بہت سارے ترقی یافتہ ممالک کے بارے میں سنتے ہیں کہ کیسے وہاں کی حکومتیں اپنےباشندوں کی مشکلات کو کم کرنے کے لیے کوشاں ہیں۔ ہر فرد کے لئے مالی امداد کا اہتمام کرنے کے ساتھ ساتھ خوردونوش کی اشیاء گھر کی دہلیز پر پہنچائی جارہی ہیں۔ اس کی وجہ یہ بھی ہے کہ ان ممالک کے وسائل مالی اور تنظیمی لحاظ سے بہت بہتر ہیں۔
ہمارے ہاں طبی سہولیات کو کھنگالا جائے تو معلوم ہوگا کہ حالات شاید مثالی نہیں ہیں۔ بلکہ اکثر ممالک کی نسبت کافی ابتر دکھائی دیتے ہیں اور مستقبل کے بارے میں بے تحاشہ شکوک و شبہات نظر آتے ہیں۔ ہم ہرگز کسی ترقی یافتہ ملک کے ساتھ موازنہ کرنے کے قابل دکھائی نہیں دیتے۔ ہم نہ تو مالی طور پر کسی مضبوط معیشت کے مالک ہیں اور نہ ہی ہمارے ہاں کوئی ایسی تنظیم سازی ہوئی ہے جو ان مشکل حالات میں ہم وطنوں کی مشکلات کو کم کرنے میں کوئی کردار ادا کر سکے۔ ہمارا طبی شعبہ بھی کوئی قابل ستائش نہیں بلکہ یہاں تو عام حالات میں روزمرہ کی بیماریوں سے نمٹنے کی صلاحیت کا بھی فقدان نظر آتا ہے۔
مگر ٹھہریے!بہت کچھ قابل رشک بھی ہے۔ میں نے اپنے لوگوں میں ایک بے فکری اور اللہ پر توکل دیکھا ہے۔ میں نے دیکھا ہے جب ساری دنیا اجتماعیت کے سبھی راستے بند کر کے معاشرتی دوری اختیار کر رہی ہے اسی دور میں ہماری مسجدیں قیام کرنے والوں سے آباد ہیں۔ یہ عمل صحیح ہے یا غلط اس پر بحث کئے بغیر ان لوگوں میں اللہ تعالی سے معافی کی طلب اور زندگی اور موت اس کے ہاتھ میں ہونے کا یقین دکھائی دیتا ہے ہے۔
اس دورِ آفت میں کہ جب عالمی ادارہ صحت اور دوسرے اداروں کو ڈر ہے کہ دنیا کی ایک کثیر آبادی بھوک اور وسائل کی کمی کا شکار ہو سکتی ہے میں نے بہت سے لوگوں کو چپکے سے ضرورت مندوں کی مدد کرتے دیکھا ہے۔خاص طور پر میں یہاں اپنے کچھ بہت ہی عزیز طلباء کا ذکر کرنا چاہوں گا جو مل کر بہت سارے خاندانوں کے لیے راشن کا انتظام کر رہے ہیں۔ یہ وہ بچے ہیں جنہیں شاید آج سے پہلے بہت ہی شاہ خرچ پایا تھا مگر جب ان کو اپنی قوم کے ضرورت مندوں کے لیے بغیر کسی شرم کے امداد جمع کرتے دیکھا تو دل میں ان کی عزت کئی گنا بڑھ گئی۔ اللہ تعالی انہیں اس نیک مقصد میں کامیاب کرے اور اسی وسیلے سے ان کے لیے اس دنیا اور آخرت میں کامیابی کا سامان پیدا کرے آمین!
ایک بابا جی کے ساتھ ان کے رکشے میں سفر کا موقع ملا۔وہ صحیح معنوں میں ایک زندہ دل انسان محسوس ہوئے۔ پہلے تو ہمیں اپنی مزاح بھری باتوںس ے ہنسایا، پھربولے بیٹا، میر تو خیال ہے کہ کورونا کا کوئی وجود ہی نہیں۔ مجھے تو یہ صرف ایک تخیلاتی بیماری محسوس ہوتی ہے۔ اور اگر یہ بیماری موجود بھی ہے تو یہ لوگوں کو اللہ یاد کروانے کے لیے آئی ہے۔لہذا اس سے ڈرنا کیسا؟ مرنا تو ایک دن لازم ہے پھر چاہے وجہ کچھ بھی بن جائے۔ ان کی گفتگو سے احساس ہوا کہ شاید یہ ہمارے ایمان کی کمزوری ہے جس نے ہمیں اس قدر خوفزدہ کر رکھا ہے ورنہ دنیا میں لاتعداد ایسی بیماریاں موجود ہیں جن کا ابھی تک کوئی علاج معلوم نہیں کیا جا سکا ۔ ان میں بہت سی جان لیوا بھی ہیں مگر یہ کورونا تو انسان کو اللہ تعالیٰ کی یاد کروانے کے واسطے ہی آیا ہے۔
چندماہ پہلے کی دنیا پر نظر دوڑائیں تو معلوم ہوگا کہ انسان بہت تیزی کے ساتھ اس دنیا اور اس میں موجود اللہ تعالی کی نعمتوں کے ضیاع میں مصروف عمل تھا۔اکثر سننے میں آتا تھا کہ صنعتی ترقی کی وجہ سے جو ماحولیاتی آلودگی پیدا ہورہی ہے اس کو روکنا مشکل ہی نہیں بلکہ ناممکن ہے۔ یہ آلودگی انسانوں کے ساتھ ساتھ باقی تمام مخلوقات کے لئے بھی نقصان دہ بلکہ جان لیوا ثابت ہو رہی تھی۔ مگر قدرت کا پہیہ دیکھیے کہ ایسا گھوما کہ انسان کی ترقی اور تیزی کا ہر پہیہ جیسے رک سا گیا۔آلودگی پھیلانے والے تمام اسباب آج میٹھی نیند سو رہے ہیں ۔ انسانوں کے علاوہ باقی تمام مخلوقات کے لئے تو جیسے عید کا سماں معلوم ہورہا ہے ۔صبح کے وقت جاگ کر اب کی دفعہ ایسے ایسے پرندے دکھائی اور سنائی دیتے ہیں جو آج سے پہلے شاید کبھی نہ دیکھے تھے۔
انسانی زندگی جس قدر تیز رفتار تھی اسی قدر دوری پسند بھی تھی ایک ہی خاندان کے افراد ایک دوسرے کے ساتھ شاید بیٹھ بھی نہ سکتے تھے اور انہیں ایک ساتھ جمع ہونے کے لئے کسی تہوار یا خوشی غمی کی ضرورت درکار ہوتی تھی.آج اس مشکل کی بدولت لوگ اپنے پیاروں کے قریب آبیٹھے ہیں۔اس آفت کے بہانے لوگ ایک دوسرے کی خیریت دریافت کرنے لگے ایک دوسرے کا حال پوچھنے لگے ہیں وہ رشتے جو حال احوال نہ پوچھنے کی وجہ سے ماند پڑتے جا رہے تھےاس مشکل وقت نے ان میں بھی ایک نئی روح پھونک دی ہے۔

مجھے تو ان سب مثبت تبدیلیوں میں اس با برکت مہینے کا کردار بھی نظر آتا ہے۔ یہ وہی مہینہ ہے جس میں اللہ تعالی نے اپنی اپنا پاک کلام نازل کیا۔ دیکھا جائے تو اسلام کی تاریخ ہمیں بتاتی ہے کہ مسلمانوں نے اکثر مشکلات کا سامنا بھی اسی مہینے میں کیا اور اللہ تعالی کی نصرت سے ہمیشہ ہر مشکل سے چھٹکارا بھی حاصل کیا۔ اللہ تعالی سے دعا ہے کہ اس بابرکت مہینے کے طفیل ہمیں اور تمام دنیا کو اس ناگہانی آفت سے محفوظ فرمائے۔ آمین!