پاکستان مرکزی مسلم لیگ کراچی کے زیر اہتمام پریس کلب پر شہید حماس رہنما یحییٰ السنوار کی غائبانہ نماز جنازہ ادا کی گئی۔ نماز جنازہ کی امامت مفتی محمدیوسف کشمیری نے کی ۔جبکہ اس موقع پر مرکزی مسلم لیگ کے رہنماؤں اور کارکنان کی بڑی تعداد نے شرکت کی۔ شرکاء نے فلک شگاف نعرے لگائے اور یحییٰ السنوار کو خراج تحسین پیش کیا۔جنازہ کے موقع سے کراچی کے صدراحمدندیم اعوان ،رہنمامفتی محمدیوسف کشمیری ،نائب صدرانجینئر نعمان علی ،مہدی اسحاق،جوائنٹ سیکرٹری فیصل علی بلوچ اور مسلم یوتھ لیگ سندھ کے صدربلال چیمہ سمیت دیگررہنماؤں نے خطاب کیا۔
جاری اعلامیہ کے مطابق جنازہ کے موقع پر شرکاءسے خطاب کرتے ہوئے کراچی کے صدراحمدندیم اعوان نے کہاکہ اہل غزہ اپنی آزادی کی جدوجہد کر رہے ہیں، اور فلسطینی قیادت قربانیوں میں سر فہرست ہے۔ اسرائیلی سربریت پر پوری دنیا خاموش تماشائی بنی ہوئی ہے، جبکہ اقوام متحدہ بھی کوئی مؤثر کردار ادا نہیں کر رہا۔ غزہ کے لوگوں نے دلیری کی مثال قائم کی ہے۔ مرکزی مسلم لیگ ہر پلیٹ فارم پر فلسطینیوں کی حمایت جاری رکھے گی۔ان کا کہناتھاکہ اسرائیل فلسطینی ماؤں، بہنوں اور بچوں کے خون کاپیاسا بن چکا ہے۔ اب تک اسرائیل پینتالیس ہزار سے زائد فلسطینیوں کو شہید کر چکا ہے۔ لیکن اقوام متحدہ فلسطینیوں کی نسل کشی پر خاموش ہے۔ پوری دنیا اس صورتحال پر گونگی تماشائی بنی ہوئی ہے۔
مرکزی مسلم لیگ حکومت پاکستان سے مطالبہ کرتی ہے کہ اے پی سی کی تجاویز پر عمل درآمد کرے اور مسئلہ فلسطین پر عملی کردار ادا کرے۔جنازے کےشرکاءسے خطاب کرتے ہوئےمقررین نے کہاکہ اسرائیل اس دور کا فرعون بن چکا ہے، اور اس نے انبیاء کی سرزمین کو خون سے رنگین کر دیا ہے۔ یحییٰ السنوار نے قبلہ اول کی خاطر اپنی جان قربان کی۔ مرکزی مسلم لیگ یحییٰ السنوار شہید کو خراج عقیدت پیش کرتی ہے اور فلسطینی شہداء کو سلام پیش کرتی ہے۔ان کا کہنا تھاکہ اقوام متحدہ مسلمانوں کے بارے میں دوغلی پالیسی اختیار کیے ہوئے ہے، جبکہ جانوروں کے حقوق کی بات کرنے والے فلسطینی شہداء کو نظرانداز کر رہے ہیں۔ مسلمانوں کے سربراہوں کی خاموشی ایک المیہ ہے۔مسلمانوں کا بچہ بچہ قبلہ اول کی آزادی کے لیے جذبہ شہادت سے سرشار ہے، اور مسلم حکمرانوں کو ایک مضبوط پالیسی اختیار کرنی ہوگی۔
