پی ایس ایل: اسلام آباد یونائیٹڈ کا کوئٹہ گلیڈی ایٹرز کو جیت کیلئے 169 رنز کا ہدف

کراچی:: اسلام آباد یونائیٹڈ نے پہلے بلے بازی کرتے ہوئے انیس اعشاریہ ایک اوورز میں 168 رنز بنائے۔ کوئٹہ گلیڈی ایٹرز کی جانب سے محمد حسنین کامیاب باؤلر رہے جنہوں نے 4 وکٹیں حاصل کیں۔

نیشنل کرکٹ سٹیڈیم میں کھیلے جا رہے پی ایس ایل فائیو کے افتتاحی میچ کا ٹاس کوئٹہ گلیڈی ایٹرز نے جیت کر اسلام آباد یونائیٹڈ کو بیٹنگ کی دعوت دی تھی۔

اسلام آباد یونائیڈ کی جانب سے منرو اور رونچی بڑا سکور بنانے کا جذبہ لیے میدان میں اترے لیکن محمد نواز نے ان کی امیدوں پر پانی پھیر دیا۔ انہوں نے اپنی ہی گیند پر کیچ کیا اور منرو کو صفر پر آؤٹ کرکے پویلین کی راہ دکھائی۔

اسلام آباد یونائیٹڈ کی دوسری وکٹ 38 پر گری جب سہیل خان نے قدرے جارحانہ بلے باز کر رہے رونچی کو آؤٹ کر دیا۔ رونچی نے 13 گیندوں کا سامنا کرتے ہوئے ایک چھکے اور 4 چوکوں کی مدد سے 23 رنز بنائے۔ ان کا کیچ احمد شہزاد نے لیا۔

تیسرے آؤٹ ہونے والے کھلاڑی حسین طلعت تھے جو محمد حسنین کی گیند کا شکار بنے۔ انہوں نے 22 گیندوں کا سامنا کرتے ہوئے ایک چوکے کی مدد سے 19 رنز بنائے۔ ان کا کیچ بھی احمد شہزاد نے پکڑا۔

اسلام آباد یونائیٹڈ کی جانب سے ڈی جے میلان نے شاندار اننگز کھیلی، انہوں نے 40 گیندوں کا سامنا کرتے ہوئے پانچ چوکوں اور تین چھکوں کی مدد سے 64 رنز کی جارحانہ اننگز کھیلی۔ ان کی وکٹ کٹنگ کے حصے میں آئی۔ پانچویں آؤٹ ہونے والے کھلاڑی انگرام تھے جو صرف 6 رنز بنا سکے جبکہ چھٹے آؤٹ ہونے والے بلے باز محمد آصف تھے جو 19رنز بنا سکے۔

ساتویں آؤٹ ہونے والے کھلاڑی کپتان شاداب خان تھے جو صرف 8 رنز بنا کر واپس پویلین پہنچے۔ان کی وکٹ بھی کٹنگ نے لی۔ اس کے فوری بعد ہی فہیم اشرف بھی آؤٹ ہو گئے، انہوں نے 20 رنز بنائے۔ نویں آؤٹ ہونے والے بلے باز محمد موسیٰ تھے بغیر رن بنائے کیچ آؤٹ ہو گئے۔ آخری آؤٹ ہونے والے کھلاڑی عماد بٹ بھی بغیر کوئی رن بنائے واپس پہنچے۔

کوئٹہ گلیڈٰ ایٹرز کی جانب سے محمد حسنین نے شاندار گیند بازی کا مظاہرہ کرتے ہوئے چار اوورز میں صرف 25 رنز دے کر 4 وکٹیں حاصل کیں۔ دیگر گیند بازوں میں کٹنگ نے 3، سہیل خان نے دو جبکہ محمد نواز نے ایک وکٹ حاصل کی۔ اسلام آباد یونائیٹڈ نے مقررہ بیس اوورز میں کوئٹہ گلیڈی ایٹرز کو جیت کیلئے 169 رنز کا ہدف دیا ہے۔

ٹاس کے بعد رمیز راجہ سے گفتگو کرتے ہوئے اسلام آباد یونائیٹڈ کے کپتان شاداب خان نے کہا کہ پچ بیٹنگ کیلئے سازگار ہے۔ 180 سے زائد سکور کرنے کی کوشش کریں گے جبکہ کوئٹہ گلیڈی ایٹرز کے کپتان سرفراز احمد کا کہنا تھا کہ کوشش ہے کم سے کم سکور پر اسلام آباد یونائیٹڈ کی ٹیم کو آؤٹ کریں۔