لاہور:: پاکستان اور بنگلا دیش کے درمیان راولپنڈی میں کھیلے جانے والے سیریز کے پہلے ٹیسٹ کے دوسرے روز کے دوران قومی ٹیم کے بیٹسمینوں نے مہمان باؤلرز کی خوب درگت بنائی، قومی ٹیم نے پہلی اننگز کے دوران 109 رنز کی برتری حاصل کر لی ہے۔ بابر اعظم اور شان مسعود نے شاندار سنچریاں داغ دیں۔ بابر اعظم کی ٹیسٹ میں یہ مسلسل تیسری سنچری تھی۔
گزشتہ رور 233 رنز پر ڈھیر ہونے کے بعد بنگلا دیشی ٹیم کے جواب میں قومی ٹیم کی طرف سے اننگز کا آغاز عابد علی اور شان مسعود نے کیا۔ مسلسل دو سنچریاں داغنے والے اوپنر عابد علی تیسری باری میں بد قسمت ثابت ہوئے اور دوسرے اوورز میں ہی ابو جائید کی گیند پر وکٹ کیپر لٹن داس کو کیچ دے بیٹھے۔ اوپنر بغیر کوئی رنز بنائے پویلین لوٹے۔
قومی ٹیسٹ ٹیم کے کپتان اظہر علی نے شان مسعود کے ساتھ مل کر سکور کو آگے بڑھایا اور دونوں نے شاندار انداز میں کرتے ہوئے سکور کو آگے بڑھایا۔ دونوں کے درمیان چند خوبصورت شارٹس دیکھنے کو ملے۔ کپتان 93 کے مجموعی سکور پر 34 رنز بنا کر پویلین لوٹ گئے۔ اس بار بھی وکٹ ابو جائید کے حصے میں آئی۔
قومی ٹیم کے سینئر بلے باز بابراعظم نے اس دوران شان مسعود کے ساتھ مل کر سکور کو آگے بڑھایا، دونوں نے حریف باؤلرز کو بے بس کر دیا اور رنز کو آگے بڑھاتے رہے۔
شان مسعود نے اپنے کیریئر کی تیسری سنچری داغی اور 100 رنز بنا کر سپنر تیج الاسلام کی گیند پر بولڈ ہو گئے۔ اس دوران قومی ٹیم کے سینئر بلے باز بابر اعظم نے بھی شاندار سنچری داغی یہ ان کے کیریئر کی پانچویں سنچری تھی۔ ان کی بیٹنگ کا اس سے اندازہ لگایا جا سکتا ہے کہ گزشتہ مسلسل تیسرے میچ میں یہ لگاتار تیسری سنچری تھی۔
واضح رہے کہ بابر اعظم گزشتہ سال سری لنکا کے خلاف راولپنڈی میں کھیلے جانے والے ٹیسٹ میچ کے دوران آخری روز 102 رنز کی اننگز کھیلی تھی جبکہ اس سے اگلے ٹیسٹ میچ کے لیے کراچی کا رُخ کیا تھا جہاں انہوں نے پہلی اننگز میں 60 رنز جبکہ دوسری اننگز میں 100 رنز کی ناٹ آؤٹ اننگز کھیلی تھی۔
قومی ٹیم کی طرف سے سینئرز بیٹسمین اسد شفیق اور بابر اعظم نے شاندار انداز میں بیٹنگ کرتے ہوئے سکور کو آگے بڑھایا۔ دونوں بیٹسمینوں کے درمیان 137 رنز کی پارٹنر شپ بنی۔ اس پارٹنرشپ میں بابر اعظم کے حصے میں 75 رنز جبکہ اسد شفیق نے 60 رنز کی اننگز کھیلی۔
قومی ٹیم نے دوسرے روز پر کھیل کے اختتام پر 342 رنز بنا لیے ہیں، بابر اعظم 143 رنز اور اسد شفیق 60رنز کیساتھ کریز پر موجود ہیں۔ پورے دن کے دوران مہمان باؤلرز صرف تین وکٹیں حاصل کر سکے۔
اس سے قبل پاکستان نے راولپنڈی میں کھیلے جانے والے سیریز کے پہلے ٹیسٹ میچ کے دوران ٹاس جیت کر پہلے باؤلنگ کرنے کو ترجیح دی تھی۔ مہمان ٹیم کی طرف سے اننگز کا آغاز تمیم اقبال اور سیف حسن نے کیا، بنگال ٹائیگر کا آغاز اچھا نہ تھا، شاہین آفریدی نے پہلے ہی اوور میں سیف حسن کو پویلین بھیج دیا۔ بیٹسمین دو گیندوں پر صفر رنز بنا کر سلپ میں موجود اسد شفیق کو کیچ دے بیٹھے۔
بنگلا دیش کو دوسرا نقصان تمیم اقبال کی شکل میں اٹھانا پڑا جب اننگز کے دوسرے اوورز میں فاسٹ باؤلر محمد عباس نے حریف سینئر بیٹسمین کو 3 رنز پر ایل بی ڈبلیو کر دیا۔
ون ڈاؤن بیٹسمین نجم الحسن شانتو اور کپتان مومن الحق نے اس دوران سکور کو آگے بڑھایا، دونوں کے درمیان ففٹی رنز کی شراکت داری بھی بنی۔ تاہم شاہین شاہ آفریدی کی گیند پر حریف کپتان 59 گیندوں پر 30 رنز بنا کر وکٹ کیپر محمد رضوان کو کیچ دے بیٹھے۔
95 کے مجموعی سکور پر نجم الحسن شانتو 110 گیندوں پر 44 رنز بنا کر محمد عباس کا شکار بن گئے، وکٹ کے عقب میں محمد رضوان نے کیچ تھاما۔
سینئر بیٹسمین محمود اللہ اور محمد مٹھن نے اننگز کا سکور آگے بڑھایا، اس دوران دونوں بیٹسمینوں نے چند خوبصورت شارٹس کھیلے تاہم محمود اللہ 25 رنز بنا کر شاہین شاہ آفریدی کا شکار بن گئے، سلپ میں موجود اسد شفیق نے شاندار کیچ تھاما۔
محمد مٹھن اور لٹن داس نے بھی مزاحمتی اننگز کھیلی اور کچھوے کی طرح چال چلتے ہوئے سکور کو آگے بڑھایا ۔ دونوں کے درمیان ففٹی رنز کی بھی پارٹنر شپ بنی۔ لٹن داس 46 گیندوں پر 33 رنز بنا کر پارٹ ٹائم فاسٹ باؤلر حارث سہیل کی گیند پر ایل بی ڈبلیو ہو گئے۔
تیج الاسلام اور محمد مٹھن کے درمیان بھی ففٹی رنز کی شراکت داری بنی، دونوں نے محتاط انداز میں بیٹنگ کرتے ہوئے سکور کو آگے بڑھایا، تاہم تیج الاسلام حارث سہیل کی گیند پر یاسر شاہ کو کیچ دے بیٹھے، انہوں نے 72 گیندوں کا سامنا کرتے ہوئے 24 رنز کی اننگز کھیلی۔ روبیل حسین ایک رن بنا کر شاہین شاہ آفریدی کی گیند پر بولڈ ہو گئے۔
233 کے مجموعی سکور پر فاسٹ باؤلر نسیم شاہ نے مزاحمتی اننگز کھیلنے والے بیٹسمین محمد مٹھن کو پویلین بھیجا، مہمان بیٹسمین نے 140 گیندوں پر 63 رنز کی باری کھیلی، وکٹ کے عقب میں محمد رضوان نے کیچ تھاما۔
ابو جائید صفر پر رن آؤٹ ہوئے، عبادت حسین صفر پر ناٹ آؤٹ رہے۔ مہمان ٹیم 233 رنز پر ڈھیر ہو گئی۔ قومی ٹیم کی طرف سے فاسٹ باؤلر شاہین شاہ آفریدی نے شاندار باؤلنگ کرتے ہوئے چار شکار کیے جبکہ محمد عباس، حارث سہیل نے 2.2 وکٹیں حاصل کیں جبکہ نسیم شاہ کے حصے میں ایک وکٹ آئی۔
