کراچی:: کراچی صرافہ ایسوسی ایشن کے مطابق سونے کی قیمت میں آج 150 روپے کا اضافہ دیکھا گیا، قیمت بڑھنے کی وجہ سے فی تولہ سونا 89 ہزار 950 روپے میں فروخت ہوا۔
اسی طرح 10 گرام سونے کی قیمت میں 128 روپے اضافہ ریکارڈ کیا گیا جس کے بعد مارکیٹ میں اس کی 77 ہزار 118 روپے پر فروخت دیکھی گئی۔ گزشتہ روز 10 گرام سونا 76 ہزار نو سو نوے میں فروخت ہوا تھا۔
اس کے علاوہ چاندی کے نرخ کی بات کی جائے تو ان میں کوئی فرق نظر نہیں آیا۔ ایک تولہ چاندی 1030 جبکہ 10 گرام چاندی 883 میں فروخت کی گئی۔
خیال رہے کہ گزشتہ روز ملک بھر میں کاروباری ہفتے کے پہلے روز کے دوران سونے کی فی تولہ اور دس گرام قیمتوں میں بالترتیب 300 روپے اور 258 روپے کا اضافہ ریکارڈ کیا گیا تھا۔ بین الاقوامی مارکیٹ میں سونے کی قیمت 3 ڈالر بڑھنے سے نئی قیمت 1560امریکی ڈالر ہو گئی تھی۔
بین الاقوامی مارکیٹ میں قیمت بڑھنے کے بعد صرافہ مارکیٹوں میں فی تولہ سونے کی قیمت میں 300 روپے کا اضافہ دیکھا گیا۔ جس کے بعد لاہور، کراچی، اسلام آباد، پشاور، کوئٹہ، حیدر آباد، سکھر، فیصل آباد، راولپنڈی سمیت دیگر جگہوں پر نئی قیمت 89800 روپے ہو گئی۔
